“Kənd təsərrüfatında uşaq əməyinin aradan qaldırılmasında işəgötürənlərin  rolu” layihəsi

  Azərbaycan Respublikası Sahibkarlar (İşəgötürənlər) Təşkilatları Milli Konfederasiyası Beynəlxalq Əmək Təşkilatının dəstəyi ilə 2004-cü ildən başlayaraq həyata keçirdiyi “Kənd təsərrüfatında uşaq əməyinin aradan qaldırılmasında işəgötürənlərin  rolu” layihəsini müvəffəqiyyətlə başa çatdırmışdır.
Layihənin icrası 3 mərhələdə aparılmışdır. Birinci mərhələ Azərbaycanın Biləsuvar, İmişli, Ağcabədi, Beyləqan, Bərdə, Ucar, Kürdəmir kimi pambıqçılıq rayonlarını əhatə etmişdir. Layihə çərçivəsində aparılmış araşdırma vasitəsilə uşaq əməyi ilə bağlı milli qanunvericilik və beynəlxalq hüquq normaları; pambıq plantasiyalarında uşaq əməyinin miqyası və təbiəti, səbəb və nəticələri, uşaqların sağlamlığına və təhsilinə olan təsirləri; uşaq əməyinə münasibət və digər məsələlər öyrənilmişdir.
         Qeyd edək ki, bu, Azərbaycanın kənd təsərrüfatı sektorunda uşaq əməyindən istifadə olunması ilə bağlı respublikada aparılan ilk araşdırma olmuşdur.
          İkinci mərhələ kənd təsərrüfatında, xüsusilə pambıqçılıqda təhlükəli uşaq əməyinin ləğv olunmasına yönəldilmişdir .
     Layihənin üçüncü mərhələsi çayçılıq və tütünçülük sahələrini əhat etmişdir. Ölkənin çay və tütünçülük plantasiyalarında uşaq əməyini qiymətləndirmək məqsədilə ASK-nın layihə komandası Lənkəran, Astara, Masallı, Lerik, Şəki, Qax, Zaqatala və Balakən rayonlarına faktaraşdırıcı səfərlər təşkil etmişdir. Səfərlər zamanı işəgötürənlər, yerli icra hakimiyyəti və bələdiyyə nümayəndələri, təhsil işçiləri, işləyən uşaqlar və onların  valideynləri ilə görüşlər keçirilmiş, çay və tütün istehsalında uşaq əməyindən istifadə halları, uşaqların sağlamlığı və təhsili ilə bağlı vəziyyət öyrənilmişdir.
       ASK-nın layihə heyəti kənd təsərrüfatında uşaq əməyinə dair əldə edilmiş faktlar və nəticələrin təqdim edilməsi, bununla da işəgötürənlərin və digər maraqlı tərəflərin uşaq əməyi ilə bağlı həssaslığının artırılması məqsədi ilə layihə rayonlarında yeddi dəyirmi masa keçirmişdir.
      ASK-nın layihə qrupu işəgötürənləri uşaq əməyi ilə bağlı beynəlxalq hüquq normaları, xüsusilə BƏT-in, Minimum Yaş Həddi haqqında 138 və Uşaq Əməyinin Ən Ağır Formaları haqqında 182 saylı Konvensiyaları, milli qanunvericilik barədə məlumatlarla təmin etmək üçün üç treninq vəsaiti və bir məlumat kitabçası hazırlamış və nəşr etdirmişdir. Layihə çərçivəsində 3  Trenerlərin Treninqi kursu təşkil edilmiş və ASK-nın 22 nəfərdən ibarət trenerlər komandası tərəfindən pambıqçılıq, çayçılıq və tütünçülük rayonlarında yaşayan və fəaliyyət göstərən işəgötürənlər üçün 24 maarifləndirici seminar keçirilmişdir. Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının layihə üzrə işçi qrupu layihə rayonlarında iki monitorinq aparmışdır. Monitorinq qrupu birbaşa pambıq, çay və tütün plantasiyalarında olmuş, uşaqlar və onların valideynləri, işəgötürənlər, yerli icra hakimiyyəti orqanları və bələdiyyə  nümayəndələri, icma rəhbərləri ilə bir sıra görüşlər keçirmişdir.
    Layihənin icrası dövründə sosial tərəfdaşlar, həmçinin uşaq problemləri ilə məşğul olan yerli qeyri-hökumət və beynəlxalq təşkilatlar,  kütləvi informasiya vasitələri  ilə sıx əlaqələr qurulmuşdur. Layihənin icrası üzrə bütün tədbirlər respublikanın qəzet və jurnallarında əks etdirilmiş, televiziya və radio tərəfindən işıqlandırılmışdır.
        30-31 oktyabr 2008-ci il tarixdə Bakı şəhərində Azərbaycan Respublikası Sahibkarlar (İşəgötürənlər) Təşkilatları Milli Konfederasiyası Beynəlxalq Əmək Təşkilatının dəstəyi ilə Regionlararası Konfrans keçirilmişdir. Konfransda əldə olunmuş nəticələr ümumiləşdirilmiş, işəgötürənlər təşkilatları və işəgötürənlərin rolunun artırılması yolları araşdırılmış, yaxşı təcrübələrin mübadiləsi aparılmış, uşaq əməyinin aradan qaldırılmasına nail olmaq üçün sonrakı mübarizə yolları müəyyənləşdirilmiş.
      Konfransda BƏT-in Cenevrə və Moskva ofislərinin, həmçinin region ölkələrinin - Türkiyə, Gürcüstan, Ukrayna, Moldova, Qazaxıstan, Qırğızıstan, Tacikistan və Özbəkistan nümayəndələrindən ibarət 30 nəfərlik xarici nümayəndə heyəti, ölkəmizin müvafiq hökumət qurumları, yerli və beynəlxalq təşkilatlarının nümayəndələri və işəgötürənlər iştirak etmişdir.