Ölkə iqtisadiyyatının inkişafında əldə olunan nailiyyətlər ilk növbədə Ümummilli lider H.Əliyevin və onun siyasi varisi, davamçısı İ.Əliyevin ölkədə apardığı uğurlu daxili və xarici siyasət nəticəsində mümkün olmuşdur. Ölkədə bərqərar olmuş sabitlik, iqtisadi yüksəliş dövlət başçısı başda olmaqla bütün dövlət strukturlarının gərgin əməyi və səmərəli fəaliyyətinin bəhrəsidir. Ölkə iqtisadiyyatının inkişafı üzrə əldə olunmuş nailiyyətlər ilbəil davam etməsi və bərqərar olmuş makroiqtisadi sabitliyin dönməz xarakter alması və daha da dərinləşməsi həyata keçirilən iqtisadi siyasətin düzgünlüyünü və effektivliyini sübut edir. Son illər ölkə iqtisadiyyatının yüksək inkişaf tempi bank sektorunun da sürətli inkişafına şərait yaratmışdır. Ümumdünya maliyyə böhranının getdikcə genişlənməsinə baxmayaraq, ölkənin bank sistemində inflyasiyanın məqbul səviyyədə saxlanılmasına, milli valyutanın məzənnəsinin sabitliyinin təmin olunmasına, beynəlxalq normalara uyğun valyuta ehtiyatlarının qorunub saxlanılmasına, bank sisteminin daha da möhkəmləndirilməsinə və iqtisadiyyatın pulla təminatının daha da yaxşılaşmasına yönəldilmiş  pul-kredit siyasəti aparılır. Respublikanın bank sisteminin inkişafının, ona qarşı inamın yüksəldilməsinin ən bariz nümunəsi banklarda depozit bazasının artım səviyyəsidir. 2009-cu ilin I rübündə ölkənin bank sistemində əmanət və depozitlərin həcmi yalnız fiziki şəxslərin əmanətləri üzrə 22,3% artmış və 1,8 mld manat təşkil etmişdir. Bu amil də əhalinin bank sisteminə inamının daha da artımının bir göstəricisidir. Bank sisteminə  və milli valyutaya etibarın yüksəlməsi həm də faiz dərəcələrinin aşağı düşməsinə şərait yaratmışdır. Bu da banklar tərəfindən iqtisadiyyatın daha sərfəli şərtlərlə kreditləşdirilməsinə imkan yaradır. Bank sektorunun inkişafını xarakterizə edən əsas amillərdən biri də kredit təşkilatları tərəfindən iqtisadiyyata kredit qoyuluşlarının artım tempidir. Ötən illə müqayisədə bu göstərici 51% artaraq 7,2 mld manat təşkil etmişdir.
     1993-cü ildə təsis olunmuş «Texnikabank» ASC respublikanın bank sektorunda aparıcı mövqeyə malikdir. Bank aktivlərin, kredit portfelinin həcminə, mənfəətliyə görə respublikanın bank sistemində üçüncü pilləni tutur, ölkənin bank sektorunda 5%-lik bazar payına malikdir. Bank 35 filial və 2 xidmət şöbəsinin 500 nəfərdən çox işçisi ilə 150 mindən çox müştəriyə xidmət göstərir. Əlavə olaraq, bankın sığorta, lizinq sahələri üzrə törəmə müəssisələri və həmçinin qiymətli kağızlar üzrə broker müəssisəsi fəaliyyət göstərir. «Texnikabank» ASC 2008-ci ili də uğurla başa vuraraq yüksək maliyyə nəticələrinə nail olmuşdur. Bank üzrə aktivlər ilin əvvəlinə nisbətən 26% artaraq 435 mln, kredit portfeli  37 % artaraq 334 mln, bank öhdəlikləri 24% artaraq 386 mln, bankın kapitalı 39% artaraq 49.3 mln manat təşkil etmişdir. «Texnikabank» ASC ilin sonuna kimi inkişaf istiqamətində fəaliyyətini davam etdirərək, bazar payının 10%-ə çatdırılmasını qarşısına strateji məqsəd kimi qoymuşdur.
    Respublika rəhbərliyi tərəfindən sahibkarlıq mühitinin inkişaf etdirilməsinə də xüsusi diqqət yetirilir. Sahibkarlığın inkişafına mane olan süni əngəllər, əsassız yoxlamaların aradan qaldırılması, sahibkarlığı kreditləşdirmək  məqsədi ilə Sahibkarlığa Kömək Milli Fondunun yaradılması, müvafiq qanunvericilik bazasının təkmilləşdirilməsi və digər görülən  tədbirlər sahibkarlığın inkişafı üçün münbit şərait yaradır. «Texnikabank» ASC də bank sisteminin aparıcı bir subyekti kimi sahibkarlığın inkişafına öz tövhəsini verir. Bankda hal-hazırda 1.4 mindən çox yerli sahibkarlıq subyektinə yüksək səviyyədə bank-kredit xidmətləri göstərir. Bank tərəfindən  yalnız Sahibkarlığa Kömək Milli Fondunun vəsaiti hesabına bankda 215 layihə üzrə  17.1 mln manatdan çox kredit sahibkarlıq subyektlərinin istifadəsinə verilmişdir. Eyni zamanda  bankın öz daxili vəsaitləri hesabına 236 mln manatdan çox vəsait özəl bizneslə məşğul  olan yerli sahibkarların istifadəsinə verilmişdir. Həmçinin bank Kənd Təsərrüfatı kreditləri üzrə Dövlət  agentliyinin «Şimal-Şərq» «İkinci» və «Dağ və yüksək dağlıq ərazilərin inkişaf etdirilməsi» layihələrində fəal iştirak edir və həmin layihələr üzrə 4.8 mln manatdan çox kredit 97 təsərrüfat subyektinin ixtiyarına verilmişdir. Bu ölkədə yeni iş yerlərinin  açılması, oraya yeni işçi qüvvələrinin cəlb edilməsi və son nəticədə məhsul istehsalı deməkdir. Bankda hər bir sahibkara fərdi olaraq, məşğul olduğu biznesin tələbinə müvafiq sürətdə yanaşılır, onlara maliyyə-bank sahəsində, biznes layihələrin hazırlanmasında məsləhətlər verilir. Sahibkarlara operativ şəkildə müxtəlif bank xidmətləri (hesablaşma, kassa, konvertasiya, kredit, depozit və digər) göstərilir. Bankda sahibkarları kreditləşdirmək məqsədi ilə xüsusi işçi qrup yaradılmışdır, həmin qrup tərəfindən sahibkarların təqdim etdiyi kredit sənədləri qəbul edilib diqqətlə araşdırılır, biznes planlara ətraflı baxılıb iqtisadi təhlillər aparılır, təklif olunan girovların bazar qiyməti müəyyənləşdirilir, onların likvidliyi təyin edilir və qısa müddət ərzində kreditləşmə haqqında  müvafiq qərarlar qəbul olunur. Qeyd etmək istəyirəm ki, bankla uzun müddət əməkdaşlıq edən, risk yaratma ehtimalı olmayan sahibkarlar üçün uzunmüddətli kredit xəttləri açılıb  və onların kreditləşməsi bir çox hallarda girovsuz  həyata keçirilir.
   Azərbaycan Respublikası Sahibkarlar (İşəgötürənlər) Təşkilatları Milli Konfederasiyası ölkənin özəl sektorunda sağlam qüvvələrin birləşməsi nəticəsində yüksək səmərəliliyə nail olmaq məqsədi ilə yaranmış və bu gün onun fəaliyyəti daim inkişaf etməkdədir.
     Sahibkarlar Konfederasiyası Sahibkarlığa Kömək Dövlət Proqramlarının istiqamətlərinə müvafiq olaraq, bazar infrastrukturunun daha da möhkəmlənməsinə və sahibkarlığın inkişafına kömək edir, üzvləri arasında daimi işgüzar əlaqələrin yaradılmasını təmin edir, onlarla birgə investisiya, innovasiya layihələrinin və başqa təşəbbüskar layihələrin işlənməsinə, eləcə də sağlam sahibkarlıq mühitinin formalaşmasına kömək edir, sahibkarlığın inkişafı ilə bağlı sosial-iqtisadi yönümlü müxtəlif sahə, regional və ölkə miqyaslı proqramlarının hazırlanmasında və həyata keçirilməsində iştirak edir, ölkə  sahibkarlarına xaricdə tərəfmüqabillərin tapılmasında köməklik göstərir, onların informasiya təminatında  iştirak edir, sahibkarlığın inkişafı ilə bağlı və sosial-iqtisadi yönümlü qanun və digər normativ-hüquqi aktların layihələrinin işlənib hazırlanmasını həyata keçirir, sahibkarlığın inkişafı sahəsində dünya təcrübəsinin öyrənilməsi və onların əlverişli isitqamətlərdə Azərbaycanda tətbiq edilməsi üçün şərait yaradır.
    Əlamətdar haldır ki, «Texnikabank» ASC, Bu gün öz sıralarında 3500-dən çox sahibkarlıq subyektini, o cümlədən 45-ə qədər iqtisadi və sosial yönümlü Assosiasiya və ittifaqı birləşdirən Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının ilk üzvlərindən biri, Rəyasət Heyəti və İdarə Heyətinin üzvüdür. Texnikabank sahibkarlar Konfederasiyasının Azərbaycan Respublikasının iqtisadi cəhətdən güclü dövlətə çevrilməsi, dünya iqtisadi sisteminə müvəffəqiyyətli inteqrasiyası, ölkədə mövcud iqtisadi problemlərin həlli və əhalinin maddi rifahının yaxşılaşdırılmasının etibarlı zəmini olan özəl bölmənin inkişafı istiqamətində həyata keçirilən məqsədyönlü tədbirlərin fəal iştirakçısıdır. Və ümid edirik ki, gələcəkdə də bizim bankla Sahibkarlar Konfederasiyası arasındakı əməkdaşlıq daha da yüksək səviyyədə inkişaf edəcəkdir.

 



            

            

            
  AZƏRBAYCAN BEYNƏLXALQ BANKI