Daşkənddə Beynəlxalq Multimodal Nəqliyyat Forumu keçirilib
Türk Dövlətləri Təşkilatı (TDT) tərəfindən Logistika Mərkəzləri və Yükdaşıyıcılar Alyansı, eləcə də Özbəkistan Respublikasının Nəqliyyat Nazirliyi ilə birgə təşkil olunan Beynəlxalq Multimodal Nəqliyyat Forumu 2025-ci il noyabrın 12-də Daşkənddə uğurla keçirilib. Forum, TDT-nin Bişkek və Qəbələ Zirvə görüşlərində Özbəkistan Respublikasının Prezidenti Şavkat Mirziyoyev tərəfindən irəli sürülmüş təşəbbüs əsasında reallaşdırılıb.
Tədbirdə dövlət və özəl sektor nümayəndələri, aparıcı nəqliyyat və logistika şirkətləri, eləcə də Türk regionundan və onun hüdudlarından olan işgüzar dairələr daxil olmaqla 400-dən çox iştirakçı bir araya gəlib. Forum bilik mübadiləsi, faydalı müzakirələr və multimodal nəqliyyat marşrutlarının inkişafına yönəlmiş birgə təşəbbüslər üçün dinamik platforma rolunu oynayıb.
TDT-nin Baş katibi Səfir Kubanıçbek Ömüraliyev açılış nitqində belə tədbirlərin hökumətlər və sənaye arasında körpü rolunu oynadığını, praktiki həllərin yaradılmasına və strateji nəqliyyat dəhlizlərində koordinasiyanın gücləndirilməsinə töhfə verdiyini vurğulayıb.
Baş katib Orta Dəhlizin əhəmiyyətinə toxunaraq qeyd edib ki, bu marşrut yalnız məsafə və səmərəlilik baxımından deyil, həm də yüklərin təhlükəsizliyi və marşrutların şaxələndirilməsi baxımından xüsusi önəm daşıyır. Onun sözlərinə görə, Orta Dəhliz üzrə daşınan yüklərin həcmi 2023-cü ildəki 2,7 milyon tondan 2024-cü ildə 4,5 milyon tona yüksəlib və 2027-ci ilədək bu rəqəmin 10 milyon tona çatacağı proqnozlaşdırılır.
Türk Ticarət və Sənaye Palataları Birliyinin, həmçinin Azərbaycan Sahibkarlar Konfederasiyasının prezidenti Məmməd Musayev çıxışında Orta Dəhlizin bütün Türk dünyası üçün roluna toxunub. Bildirib ki, bu dəhlizi sadəcə bir nəqliyyat marşrutu kimi yox, Türk Dünyası üçün iqtisadi suverenlik platforması kimi görmək daha doğru olardı.
“Biz regional və beynəlxalq operatorları, logistik şirkətləri, dəmiryolu, dəniz və avtomobil nəqliyyatı fəallarını bir araya gətirməliyik. Sahibkarlar, işəgötürənlər, dövlət qurumları, hamısı birgə əməkdaşlıq müstəvisində olmalıdır. Türk Ticarət və Sənaye Palataları Birliyinə daxil olan təşkilatlar bu dialoqu təşviq edir” – deyə M.Musayev qeyd edib.
Forum çərçivəsində Türk dövlətlərinin nəqliyyat nazirlərinin, beynəlxalq təşkilat rəhbərlərinin, aparıcı şirkətlərin və sənaye ekspertlərinin çıxışları dinlənilib. İştirakçılar bir neçə panel sessiyada müzakirələr aparıblar, o cümlədən:
– Nəqliyyat əlaqəliliyinin təminində Orta Dəhlizin əhəmiyyəti: nəqliyyat marşrutları, birgə operatorların yaradılması perspektivləri, logistika mərkəzləri və qovşaqları;
– Liman və quru infrastrukturlarının inkişafı, dəniz nəqliyyatı: qlobal tendensiyalar, regional çağırışlar və logistika zəncirlərinin transformasiyası;
– Elektron sənədləşməyə keçid: beynəlxalq nəqliyyatda tətbiq və inteqrasiya;
– Sərhəd keçidlərinin sadələşdirilməsi: mövcud çətinliklər və həll yolları.
Tədbir Türk dövlətlərinin regional nəqliyyat əlaqəliliyinin gücləndirilməsi, logistika şəbəkələrinin modernləşdirilməsi və davamlı, səmərəli və əməkdaşlığa əsaslanan multimodal nəqliyyat həllərinin təşviqi istiqamətində sadiqliyini bir daha təsdiqləyib.
