Konfederasiyanın Menecment Komissiyası “Menecerlərin Kvalifikasiyası” layihəsinə start verdi

Azərbaycan Sahibkarlar Konfederasiyası (ASK), ASK Biznes Konsalting MMC, ADA Universiteti və Your Personal Consalting MMC-nin birgə təşkilatçılığı ilə “Menecerlərin Kvalifikasiyası” layihəsinə start verildi. Bununla bağlı keçirilən təqdimatda vebinarda Konfederasiyanın vitse-prezidenti Vüqar Zeynalov, ADA Fondunun prezidenti Natiq Hacıyev, Bugün ASK, ADA universiteti birgə layihəsi olan ADA-nın  İxtisasartırma şöbəsinin rəhbəri Nərgiz İsmayılova iştirak ediblər.

Onlayn formatda keçirilən tədbiri Azərbaycan Sahibkarlar Konfederasiyasının Menecment Komissiyasının sədri Camid Mövsümov açaraq, komissiyanın bu layihəsinin hazırlanmasında iştirak edən üzvləri təqdim edib.

ASK-nın vitse-prezidenti Vüqar Zeynalov menecerlərin inkişafının iqtisadiyyatın inkişafında mühüm həlqə olduğunu qeyd edib. Layihənin Azərbaycan menecerləri üçün faydalı olacağını qeyd edərək, uğurlar arzulayıb.

ADA Fondunun prezidenti Natiq Hacıyev bildirib ki, Azərbaycan Sahibkarlar Konfederasiyasının sahibkarlığın inkişafında xüsusi rolu və yeri var, belə təşkilatların mövcudluğu cəmiyyətimizin inkişafına da töhfə verir. 0, ASK-nın  Qazax Müəllimlər Seminariyasının bərpa olunmasında ilk günlərdə fəal iştirakçılardan biri olduğunu vurğulayıb. ADA-nın  İxtisasartırma şöbəsinin rəhbəri Nərgiz İsmayılova “Menecerlərin Kvalifikasiyası” layihəsində tərəfdaş kimi lazımi dəstəyi göstərməyə hazır olduqlarını bildirib.

ASK Biznes Konsalting MMC-nin direktoru Şəbnəm Nuriyeva şirkətin təqdim etdiyi xidmətlər və bizneslər arasında əməkdaşlığın genişləndirilməsi üçün olan layihələr haqqında məlumat verib.

Sonra layihənin təqdimatı ilə Aytən Davudova, beynəlxalq mütəxəssislər Metin Gül və Ayla Akın çıxış ediblər.