ASK prezidenti Ulu Öndər Heydər Əliyevin anadan olmasının 100 illiyi ilə əlaqədar Gürcüstanda keçirilən tədbirdə iştirak edib
Gürcüstanda Ulu Öndər Heydər Əliyevin anadan olmasının 100 illiyi ilə əlaqədar tədbir keçirilib, Azərbaycan-Gürcüstan əlaqələrinin möhkəmləndirilməsində və strateji əməkdaşlıq səviyyəsinə yüksəlməsində Ulu Öndərin mütərəqqi xarici siyasət kursu vurğulanıb.
Tədbirdə Azərbaycan Sahibkarlar Konfederasiyasının prezidenti Məmməd Musayev də iştirak edib. Səfər çərçivəsində Konfederasiyanın prezidenti Gürcüstanın İşəgötürənlər Asossasiyasının İdarə Heyətinin sədri Elguja Meladze ilə görüşüb. Görüşdə əməkdaşlığı genişləndirmək imkanları ilə bağlı fikir mübadiləsi aparılıb.
Meladze bu ilin sentyabr ayında Gürcüstanda keçiriləcək böyük bir biznes tədbirində Azərbaycan Sahibkarlar Konfederasiyasını və üzvlərini iştiraka dəvət edib.
Qeyd edək ki, Tbilisidə Heydər Əliyev Fondu və Azərbaycan Respublikasının Gürcüstandakı Səfirliyinin təşkilatçılığı ilə Zakariya Paliaşvili adına Tbilisi Dövlət Opera və Balet Teatrında Ulu Öndər Heydər Əliyevin 100 illik yubileyi münasibətilə təntənəli tədbir keçirilib.
