ASK sahibkarlar üçün B2B görüşlər təşkil etdi

Azərbaycan Sahibkarlar Konfederasiyasının təşkilatçılığı ilə Türkiyənin bir qrup iş adamları ölkəmizdə müttəfiq axtarmaq məqsədilə biznes görüşləri keçiriblər. Tədbirə qatılan iş adamları Türkiyə Səfirliyinin Ticarət Müşavirliyi  və OSTİM Bərpaolunan Ekoloji Texnologiyalar Qrupu tərəfindən dəstəklənib.

Azərbaycan Sahibkarlar Konfederasiyası isə öz növbəsində müasir texnologiyaların və alternativ enerjinin tətbiqində maraqlı olan şirkətləri bu görüşə dəvət edib. Türkiyədən 11 şirkəti təmsil edən iş adamları azərbaycanlı sahibkarlara öz təkliflərini təqdim ediblər. Şirkətlər arasında kimya, metallurgiya, tikinti sektorunun nümayəndələri üstünlük təşkil edib. Azərbaycan şirkətləri görüşə xüsusi maraqla yanaşıblar və 60-dan yuxarı  sahibkar B2B görüşlərə qatılıb.

Sonra Türkiyənin nümayəndə heyəti Balaxanı Sənaye Parkına səfər edib və burada gördükləri emal müəssisələri və emal prosesləri onlarda çox böyük maraq yaradıb.