Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının təşkilatçılığı ilə “Vergi sistemində aparılan islahatlar: vergi qanunvericiliyində və inzibatçılığında yeniliklər” mövzusundaiş adamları ilə  görüş keçirilib. 120-dən çox sahibkarın iştirakı ilə  keçirilən görüşdə  Azərbaycan Respublikasının Prezidenti İlham Əliyev tərəfindən təsdiq edilmiş “Milli iqtisadiyyat və iqtisadiyyatın əsas sektorları üzrə strateji yol xəritəsi” ilə bağlı layihənin təqdimatı olub. Bildirilib ki, layihənin məqsədi yaxın aylarda sahibkarları narahat edən məsələlərin dövlət qurumları ilə birgə müzakirəsini aparmaq, bu sahənin inkişafına əlavə stimul verə biləcək tədbirləri reallaşdırmaq və dövlətin sahibkarlara göstərdiyi dəstəkdən hər bir hüquqi və fiziki şəxsin maksimum yararlanmasına şərait yaratmaqdır.

Son vaxtlar vergi sistemində aparılan islahatlar, onun sahibkarlığın inkişafına verəcəyi töhfələrdən danışan Azərbaycan Sahibkarlar Konfederasiyasının vitse-prezidenti Vüqar Zeynalov bildirib ki, 2017-ci il dövlət başçısı tərəfindən iqtisadi islahatların yeni dövrünün başlanğıcı elan olunub. Ona görə də Azərbaycan Sahibkarlar Konfederasiyası  bu islahatların önündə getməyə çalışır. Bunun üçün zəruri olan bütün addımlar atılır, sahibkarlara maddi və hüquqi dəstəyin miqyası genişləndirilir. O qeyd edib ki, Azərbaycan Sahibkarlar Konfederasiyası bir koordinasiya institutu olaraq strateji yol xəritəsindəki hədəflərə çatmaq üçün sahibkarla dövlət qurumları arasında dialoqun təşkilini xüsusi diqqət mərkəzində saxlayır.

Tədbirdə çıxış edən ASK-nın Baş katibi Orxan Bayramov isə bildirib ki, sahibkarları daha çox elektron ticarətlə bağlı yeniliklər maraqlandırır. Kart vasitəsilə onlayn alış-veriş, həmçinin bank hesabından nağdlaşma zamanı əlavə 1%-lik vergiyə cəlb edilmə  və s. kimi məsələlərin  müzakirəsinə ehtiyac olduqunu  deyən Orxan Bayramov  sahibkarları müzakirələr zamanı fəal olmağa dəvət edib.

Vergilər nazirinin müşaviri – Vergi ödəyicilərinə xidmət və şəffaf vergi partnyorluğu Departamentinin baş direktoru Ələkbər Məmmədov bildirib ki, Prezident İlham Əliyevin «2016-cı ildə vergi sahəsində aparılacaq islahatların istiqamətləri»nin təsdiqi və vergi inzibatçılığının təkmilləşdirilməsi  haqqında» sərəncamı vergi ödəyiciləri ilə vergi orqanları arasında qarşılıqlı etimadın və şəffaflığın daha da artırılması, sahibkarlara əlverişli şəraitin yaradılması məqsədilə vergi sistemində islahatların davam etdirilməsini  nəzərdə tutur. Sərəncamdan irəli gələn məsələlərin həlli ilə bağlı vergi sistemində aparılan islahatlar hüquqi bazanın təkmilləşdirilməsindən tutmuş vergi inzibatçılığının yenidən qurulmasına qədər bütün sahələri əhatə edir.

Görüşdə «Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında» qanunun qəbulu barədə də ətraflı söhbət açılıb. Bu qanun ölkəmizdə sahibkarlığın stimullaşdırılması, əlverişli biznes mühitinin formalaşdırılması və vergi yükünün optimallaşdırılması məqsədini daşıdığı qeyd olunub. Bildirilib ki, qanunun tətbiqi nəticəsində vergi ödəyicilərinin 727 milyon manat həcmində faiz borcları silinib və 357 milyon manat həcmində vergi borcunun müəyyən şərtlərlə silinməsi üçün də sahibkarlara real imkan yaradılıb.

Görüşdə sahibkarları maraqlandıran suallar cavablandırılıb.