Qara Dəniz İqtisadi Əməkdaşlıq Təşkilatının  Biznes Şurasının Direktorlar Heyətinin 26 oktyabr 2017-ci il tarixdə Kiyevdə keçirilmiş  növbəti  toplantısında ASK-nı Azərbaycan Sahibkarlar Konfederasiyasının Ukrayna Respublikasındakı nümayəndəsi Əli  Əliyev təmsil etmişdir. O, tədbir iştirakçılarına ASK prezidenti Məmməd Musayevin salamlarını çatdırmış, konfederasiyanın son aylardakı fəaliyyət istiqamətləri barədə müfəssəl məlumat vermişdir.

Tədbirə Qara dəniz İqtisadi Əməkdaşlıq Təşkilatına üzv ölkələrin diplomatik dairələrinin və biznes sektorunun nümayəndələri-Azərbaycan, Albaniya, Bolqarıstan, Ermənistan, Gürcüstan, Moldova, Rusiya, Rumıniya, Türkiyə və Ukrayna təmsilçiləri  də qatılmışlar.

Görüşdə Qara Dəniz hövzəsi enerji bazarının inkişaf etdirilməsi, QDİƏT BŞ-nin Nizamnaməsinə dəyişikliklər edilməsi, regional ticarətin və investisiyaların artırılması, səmərəli nəqliyyat şəbəkəsinin yaradılması, QDİƏT-in Biznes Şurasının əsas vəzifələri və prioritet fəaliyytə istiqamətlərinin maliyyələşdirilməsi və realizasiyası kimi məsələlər müzakirə edilmişdir.

Bundan əlavə, hövzə ölkələrindəki kiçik və orta sahibkarlarlıq subyektlərinin bizneslərinin  davamlı inkişafı və  dəstəklənməsi haqqında müzakirələr iştirakçılar tərəfindən maraqla qarşılanmış, ASK təmsilçisi tərəfindən bu istiqamətdə konkret təkliflər səsləndirilmişdir.