Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev Türkmənistanın ölkəmizdəki  fövqəladə və səlahiyyətli   səfiri Mekan İşanquliyevlə görüşüb. Görüşdə iki ölkənin özəl sektoru arasında iqtisadi sahədə  mövcud vəziyyəti, ticarət əlaqələrinin, investisiya  imkanlarının və gələcək əməkdaşlığının inkişaf perspektivləri  müzakirə edilib.

Görüş zamanı Azərbaycan iqtisadiyyatı, xüsusilə də özəl sektor haqqında ətraflı məlumat verən Məmməd Musayev son vaxtlar ölkəmizdə yaradılan əlverişli biznes və investisiya mühitindən, bu sahəyə  göstərilən dövlət qayğısından söhbət açıb. Qardaş Türkmənistan və Azərbaycan xalqlarının əsrlərdən bəri dostluq və əməkdaşlıq münasibətlərindən danışan Məmməd Musayev  bildirib ki, iki ölkə arasında  iqtisadi, nəqliyyat sahələrində əməkdaşlıq nümunələrimiz var. Bununla yanaşı özəl sektorun digər sahələrində  də  əlaqələrin inkişaf etdirilməsinə ehtiyac duyulur . M.Musayev  türkmən  iş adamlarını  azərbaycanlı həmkarları ilə fəal əməkdaşlığa dəvət edib.

Səkkiz aydır ölkəmizdə diplomatik fəaliyyət göstərdiyini deyən  Mekan İşanquliyev bildirib ki, səfir təyin olunduğu vəzifədə qardaş ölkələrimiz və xalqlarımız arasında əlaqələrin daha da genişləndirilməsi və gücləndirilməsi istiqamətində iş aparır. İqtisadi sektorda əlaqələrin inkişafında maraqlı olduğunu deyən diplomat,  gələckdə Azərbaycan Sahibkarlar Konfederasiyası ilə əməkdaşlıq etmək niyyətində olduğunu diqqətə çatdırıb.

Görüşün sonunda Azərbaycan Sahibkarlar Konfederasiyası ilə Türkmənistanın Ticarət və Sənaye Palatası arasında  gələcək əməkdalıq əlaqələrinin qurulmasına dair razılığa gəlinib.